یوردداش yurddaş

بو بلاگ آذربایجانلیلارین و ایراندا یاشایان باشقا تورکلرین دیل ، تاریخ ، مدنیت ، فولکلور و انسانی حاقلاری ساحه سینده چالیشیر .

اؤلومومه سئوینیرم !

+0 بَگَن (Bəyən)

 

                                             اؤلومومه سئوینیرم !

                                            حسن راشدی  24 - دی - 1383   

  آچیقلاما : بو مقاله 10 ایل قاباق یازیلمیشدیر  

 " اؤلومومه سئوینیرم "  بو سؤز یقین كی ، چوخلارینی شاشیرا بیلر ؛ آما، اینانین كی، منیم بو دئدیگیم قیسا جُمله ، ایناندیغیم بیر  گئرچكدیر .

15 یاشیمدان دوغولدوغوم كندیمیزدن آیریلاندان بو گونه كیمی گؤردویوم یوخولارین یوزه دوخسان بئشینی كندیمیزده گؤرموشم؛ ائله ایندی ده گؤرورم ! اؤلندن سونرادا بو كندده دفن اولاجاغیما ایندی‌دن سئوینیرم ؛ لاپ ائله ایكی - اوچ یاشلی بیر اوشاق اویونجاقدان سئوینَن كیمی  ؛ آخی او زامان  ، ابدی یاتاجاغیم یئرین  گون چیخانی ،  گون باتانی ، گونئیی و قوزئیی آذربایجان اولاجاق ؛ یعنی مهربان آذربایجان آنانین قوجاغیندا ابدی اولاراق راحاتلیقلا یاتاجاغام !

بئله خیال ائتمه  یین بیزیم كند "نوفل لوشاتو " كندی كیمی دیر ، یوخ. اونون قیرخ دان چوخ ائوی یوخدور ، اؤزوده چیك كرپیجدن؛ ائله لاپ گؤردویونوز آذربایجانین باشقا كندلری كیمی، بلكه ده او كندلرین یوخسوللاریندان بیری .

سون ایللرده بیر نئچه ائو قیرمیزی كرپیجدن- سئمنت‌دن تیكیلیب؛ مدرسه سی- درمانگاهی‌دا ائله قیرمیزی كرپیجدن دیر ؛ آنجاق بونلارین هئچ بیریسی منیم 15 یاشیم اولان زامان یوخ ایدی . 35 ایل بوندان قاباقلا بو گونكو  كندیمیزده چوخ شئی‌لر دگیشیب ، حتی آداملاردا ،آما بیر شئی ثابیت قالیب ، اودا كندیمیزین قیرخ ائوی دیر !

35 ایل بوندان قاباق بو كندده قیرخ ائو واریدی ، ایندی ده قیرخ ائو وار ! هله بو كند چوخ شانسلی كنددیركی،‌ ساكینلریندن بوتونلوكله بوشالماییب چوخلو آذربایجان كندلری كیمی !

 بو قیرخ ائولی كندین ساكینلری نین چالیشماسی ایله سون ایللرده دؤلت طرفیندن بو كنده " بخش موران "امتیازی عنایت اولدوقدا بیر عده : " هله قوی قالاق بلكه بیر یئره چاتدی بو كند "  دئیه ، اونو  یئر اوزوندن سیلینمَكدن قورویوب ساخلامیشلار !

كند آداملاریندان من كیمی تهرانا و باشقا فارس شهرلرینه كؤچوب -گئدنلری سایا - حِسابا سالساق اوچ- دؤرد كند قَدَری بو شهرلرده ساكینله‌شیب و اؤزلری فارسلاشما مقامینا نایل اولماسالاردا اوشاقلاری بو یوكسك مقام- مرتبه یه چاتیبلار !!

آما من‌ده نئجه دئییرلر : " اویناییب- گولورم ، اویناشیم یادیمدان چیخمیر " مَثَلی كیمی بو كندیمیز یادیمدان چیخمیر كی چیخمیر ! .......

چوخ گؤتور- قوی ائله دیم ، دئدیم 35 ایلدیر بو باشی باتمیش تهراندا یاشامیشام، بئش- اون ایل داها عؤمروم اولسا بئله سونو قبیر ائوی دیر ؛ دوزدور اؤلندن سونرادا كندیمیزده دفن اولماغا وصیّت ائتمیشَم ، آما بو تهراندا ائله "بهشت زهرا " آدینی داشییان قبریستانلیقدا تورپاغا تاپشیریلسام نه عیبی اولار كی ؟

 آما گؤردوم هر ایسته‌گیمدن كئچسَم بئله، قبریمین اوستونون توركجه یازیلماسیندان واز كئچه بیلمه‌رم ؛ "بهشت زهرا " قبریستانلیغیندادا  توركجه قبیرداشی یازیلماغا اذن وئریلمز كی!

هله چوخ زرنگ اولوب اؤلمه‌میشدن قاباق، وزیر- وكیل - جمهور رئیس یانینا گئدیب اؤزل مكتوب آلیب قبیرداشیمی توركجه یازدیرماغا اذن آلسامدا،قبیرده‌ده دیریلیك زامانی كیمی منی راحات بوراخمایاجاقلاركی!

قبیرده ده فارس اؤلولرله قونشو اولدوقومدا، اونلارین  قوهوم- اقرابالاری گلیب اؤلولری‌نین مزارینا باش چكیب، اؤلو روحونا فاتحه - یاسین اوخویان زامان گؤزلری توركجه یازیلمیش منیم قبیرداشیما دوشدوكده ، فاتحه - یاسین اوخوماغی اونودوب قبیر ائوینده‌ده روحوما زَهَرلی- زَهَرلی لطیفه- جوك یاغدیرماغا باشلایاجاقلار ! 

 هئچ اولمازسا، اؤلندن سونرا ابدی ائوده راحات یاتیم دئیه، كندیمیزده دفن اولماغی وصیّت ائتدیم !  قبیرداشیمین‌دا آنا دیلده یازیلماسینا هله‌لیك كندیمیزده عیب-ایراد توتان یوخدور؛  لاكین ایللر اؤتوب دؤوران كئچیب و منیم اوره‌ییمده دویونله‌نن آرزولاریمین دویونلری آچیلماسا و ‌آنا دیلیمیزین یاساق آلتیندا قالماسی دوام ائدَرسه ،گلیب كندیمیزده‌ده قبیرداشلارینی فارسجایا چئویرمك ایسته‌سه‌لر،‌هئچ اولمازسا قبیر ائوینده اؤز هویتیمله یاتیم دئیه ، اونادا فیكیرلَشمیشم :

" آنا دیلده بیر كیچیك داش یازدیریب جسمیمله بیرلیكده قوللاریمین آراسیندا قبیر ائوینه تاپشیرماغی وصیّت ائدیرم ! "