تاسف لر اولسون اوستادیمیز

                     پروفئسور دوكتور جواد هئیت ین باكی دا دفن مراسیمنده  

                                               شركت ائده بیلمه دیك !    

                                          حسن راشدی  24 /5 / 1393

                                           ( 15 - آگوست - 2014)

گونئی - قوزئی آذربایجانین معنوی آتاسی ، ائل آراسیندا  زمانه میزین  " دده قورقودو "  كیمی  تانینان ، تورك دونیاسی نین فخری ، حاذق طبیب و جراح اولدوغو حالدا و ایراندا ایلك دفعه اولاراق آچیق قلب عملیاتینی ( عمل قلب باز ) 1341 هجری شمسی ایل  ، بؤیرَك كؤچورمه ( پیوند كلیه ) عملیاتینی 1347 ایل و ایت لرده قلب كؤچورمه ( پیوند قلب ) عملیاتینی باشاری ایله یئرینه یئتیرَن شخصیت ، بیر الینده پیچاق اولدوغو حالدا باشقا الینه قلم آلیب ائلینین معنوی یارالارینی ساغالتماغادا عؤمور بویو چالیشیب و آذربایجان ملّتی نین هویت و وارلیغینی قوروماغا  " وارلیق " مجله سینی آنا دیلیمیزده و سون نفَسینه قدر و  35 ایل نشر ائدیب تورك دیلیمیز ، دوزگون تاریخیمیز و مدنیّتیمیز یولوندا كیتابلار تآلیف ائتدی .

آرتیق بو دگرلی شخصیت قوزئی آذربایجاندا و باكی شهری نین خسته خاناسیندا بیر نئچه هفته یوغون باخیمدا و چتین شرایط ده قالدیقدان سونرا 21 / 5/ 1393 (13 آگوست 2013 ) تاریخینده تانری رحمتینه قووشوب اونون خبری  22 / مرداد / 1393 تاریخینده یاییلاراق گونئی- قوزئی آذربایجانی یاسا باتیریب تورك دونیاسیندا بؤیوك بیر بوشلوق یاراتدی .

بو بویؤك شخصیتین وصیتینی من یاخیندان و اؤزوندن ائشیتمیشدیم ، اؤز دوغما شهری تبریزده و " مقبره الشعرا " دا دفن اولما آرزوسوندا ایدی ، آمما بو مكاندا دفن اولماغا مانع یارادیلیرسا قوزئی آذربایجاندا  و فخری باغیندا دفن اولماغی وصیت ائتمیشدی ، چونكو فخری باغیندا دفن اولما اؤنریسی شمالی آذربایجان پرزیدنتی طرفیندن اونا وئریلمیشدی .

ایكی آذربایجانین سئویملی شخصّیتی وفات ائتدیكدن سونرا اونون وصیّتینی یئرینه یئتیرمكدن اؤترو تبریزده دفن اولماسینا چالیشمالار باشلانیب مسئول مقاملارلا دانیشیلدی ، نظره گلیردی ایشلر دوزلمكده دیر لاكین پنجشنبه گونون ( دوننین ) آخشام ساعاتلارینا یاخین 23 / 5 / 1393  مقبره الشعرا اولماسادا تبریزده مشاهیرلر مكانینندا ، یعنی طوبی پاركی و باقیرخان دفن اولان مكاندا دفن اولماسی نین خبری گَلمكده ایدی كی ، تاسف لر اولسون اودا اولمادی .

بئله بیر دورومدا رحمتلیك دوكتورون وصیّتی نین ایكینجی بؤلومو عمل اولمالی و باكی دا و فخری باغیندا تورپاغا تاپشیریلمالایدی كی ، عائله سی طرفیندن بو تصمیم توتولدو  و باكی دا دفن اولما قراری وئریلدی و تشیع جنازه و دفن مراسیمی ده بو گونه ( جمعه 24/5/1393 ) تاریخینه و یاس مراسیمی ده شنبه 25/5/1393 تاریخینه دوشدو كی ظاهرا شمالی آذربایجان قانونلاری اساسیندا جنازه نی بوندان آرتیق ساخلاماق اولمازمیش .

تاسف لر اولسون ایشلرین بئله بیر دورومدا اولماسی و تشیع ، دفن مراسیمین ، ایراندا تعطیل گونلرینه دوشمه سی و  آذربایجان سفیرلیگی نین جمعه و شنبه گونلری نین تعطیل اولماسی  ویزا آلما مسئله سینی انگلله دی و اوستادیمیزین تشیع ، دفن و حتی شمالی آذربایجاندا یاس مراسیمینده بئله شركت ائده بیلمه دیك !

طبیعی كی، شمالدا یاس مراسیمی قورتاراندان سونرا تهراندا و تبریزده ده یاس مراسیملری قورولاجاق كی، اونون تاریخ و زامانی سونرا وئریله جك .

روحو شاد، یولو گئدَرلی اولسون .