+0 بَگَن (Bəyən)
سیزه بیر "انترسان " انسانی تانیتدیرماق ایسته ییرم !
دوكتور هئیت دن اؤزل خاطیره لر (3)
حسن راشدی 11 / شهریور / 1393
سؤیله نیلَن تاریخ : 6 / 12 / 1383 آخشام اوستو
گون : چهار شنبه
مكان : دوكتور هئیت مطّبی ( وارلیق دفتری )
بورادا اولانلار : اوستاد عزیز محسنی ، حسن راشدی
دوكتور هئیت :
پاریس دانیشگاهیندا من جراحلیق تخصصیمی بیتیردیگیم زامان منیم اوستادیم و ژنرال دوگولون خصوصی دوكتورو پروفئسور " لیشویتس " منی دوكتور اقبالا تانیتدیریب دئدی :
" من بو گون بیر انترسان انسانلا سیزی تانیش ائتمك ایسته ییرم، او انسان یانینیزدا اولان بو دوكتور جواد هئیت دیر ."
دوكتور اقبال دئدی : اونون آتاسی ایله من آرتیق تانیشام و اونون آتاسی دا انترسان بیر انساندیر !
پروفئسور لیشویتس دئدی : آمما بو بیر " علامه " دیر ، علامه آنلامینی فرانسه دیلینده یئتیرن سؤزجوكدن استفاده ائتدی كی، بیر عالیم دن یوخاری درجه یه دئییرلر ؛ سونرا پروفئسور لیشویتس دوكتور اقبالا دئدی ، شاها بیر مكتوب یاز و دوكتور هئیتی نانیتدیر .
دوكتور اقبال شاها بیر مكتوب یازدی كی، دوكتور هئیت چوخ فعالدیر ، بئله دیر ، ائله دیر .
دوكتور لیشویتس مكتوبا باخدی ، دئدی : من اؤزوم بیر مكتوب یازارام ؛ سونرا فوق العاده بیر مكتوب محمدرضاشاها یازیب منی شاها معرفی ائتدی .
ایرانا گلدیكدن سونرا او مكتوب اساسیندا منی دربارا چاغیردیلار ، بئله بیر دعوتی آتام بیلدیكده منه دئدی : اوغلوم شاهین یانینا گئتمه یین آداب و رسومی وار و شاهین یانینا گئتمه میشدن قاباق اونو سنه اؤیره ده جكلر ، آمما من ایندیدن سنه دئییرم ، شاهلا گؤروشنده اول شاهین الینی اؤپه جكسن ، سونرا شاه سنه اوتورماق اجازه سی وئرمه یه جك آیاق اوستونده دوراجاقسان .
من آتاما دئدیم ، آتا سن شاهلا گؤروشنده شاهین الینی اؤپورسنمی ؟
آتام دئدی : من یوخ ، آمما منیمله سنین چوخ فرقین وار ، سن هله چوخ جاوانسان .
سوروشدوم آتا ، سن جاوان ایكن قاجار شاهزاده لرین الینی اؤپوردونمو ؟
دئدی : یوخ ، من اؤپمَزدیم
دئدیم ، اوندا منده اؤپمه رم
آتام دئدی : آخی اوغلوم او زامان من روحانی ایدیم
دئدیم : منده ایندی دوكتورم !
سونرا گئتدیم دربارا شاهین حضورونا ، شاه منله گؤروشدو ، آمما اوتورماق اجازه سی وئرمه دی ، البته اؤزوده اوتورمادی و 20 دقیقه یه قدر آیاق اوستونده منله دانیشدی .
دئدی ، پروفئسور لیشویتس منه چوخ ماراقلی بیر مكتوب یازیب ، سنین نئچه یاشین وار ؟
دئدیم اوتوز حدودوندا ، دئدی اوتوزدان چوخ و یا آز ؟ گؤردوم چوخ دقیق دیر ؛ دئدیم : 27 یاشیم .
دئدی : مندن نه ایسته ییرسن ؟
دئدیم : " دانشگاه ملّی " ده ( بو گونكو دانشگاه شهید بهشتی ده ) درس دئمك
سونرا پروفئسور یحیی عدله دئدی : آقای دوكتور هئیتی آپار دانشگاها .
لاكین تاسفلر اولسون پروفئسور عدلین اطرافینداكیلار حسادت اؤزوندن قویمادیلار من دانشگاها گئدم و پروفئسور عدله دئمیشدیلر دوكتور هئیت بو دانشگاها گلرسه داها سنین ارزش و اعتبارین آزالار ، بیر حالدا كی ، پروفئسور عدل ایرانین جراحلیق آتاسی ساییلیردی و منیم اونا چوخ حؤرمتیم وارایدی .
سؤز بورا چاتدیقدا من دوكتور هئیت دن سوروشدوم : آقای دوكتور سیز شاهین الینی اؤپدونوزمو ؟
دئدی : یوخ ، اؤپمه دیم آمما ال گؤروشنده اگیلدیم . و آرتیردی : آمما من شاهی چوخ ادبلی گؤردوم و بو گوروشدن سونرادا 5 دفعه شاهلا گوروشوم اولدو.
سونرا دوكتور هئیت آرتیردی؛ پروفئسور یحیی عدل منی دانشگاها قویمادی ، آمما او اؤلنده من وارلیقدا اوندان تجلیل ائتدیم ، چونكو او تورك ایدی ، تبریزلی ایدی .