+0 بَگَن (Bəyən)
تورکجه دانیشماسان سنی معاینه ائتمه‌رم ! (۸)
دوکتور هئیت‌دن اؤزل خاطیره‌لر
حسن راشدی : ۴ دی ۱۳۹۳
سؤیله‌نیلن تاریخ : ۱۶ خرداد ۱۳۷۹
مکان : دوکتور هئیت مطبّی ( وارلیق دفتری )
زامان : دوز (دوشنبه ) گونو ساعات ۱۷-۲۰
بیر نئچه هفته ایدی اورتوگرافی سئمیناری ایله باغلی دوکتور هئیتین مطبینده آردیجیل اولاراق "وارلیق یازارلار بیرلیگی"نین جلسه‌لری کئچیردی و سئمینارین نئجه کئچمه‌سی ، کیملرین بو سئمینارا دعوت اولماسی ، سئمیناردا مقاله‌لرین اوخونماسینا واخت آییرما ترتیبی ، هئیت رئیسه عضولری و سئمینارین سونوجو اولاراق سس‌لرین (رای لرین ) نئجه آلینماسی و باشقا موضوعلاراوزه‌رینده اوزون بحثلر اولوردو .
بو بحثلر اثناسیندا ،بلکه جلسه یورودوجو اولماسین دئیه دوکتور هئیت اویرنجی‌لیک زامانیندان بیر خاطیره‌نی بئله تعریف ائتمه‌یه باشلادی :
تورکیه‌ده اؤیرنجی‌لیک ایللرین بیرینده و داها طبّ فاکولکته‌سینی بیتیریب آسیستان اولدوغوم زامان خسته‌یه باخیردیم ، بیر خسته گلدی من اونو معاینه ائتمه‌لی ایدیم .
خسته ایله دانیشماغا باشلاییب اونون نه‌دن راحاتسیز اولدوغونو سوروشدوقدا خسته تورکجه جاواب وئرمک یئرینه دئدی : من یونانجا و یا فرانسیزجا دانیشیرام .
- سوروشدوم ، سیز هارالی‌سینیز و هاردا دونیایا گلیبسینیز ؟
- دئدی ، من یونان کؤکَنلی‌یم (یونان اصیللی‌یم ) آمما استانبولدا دونیایا گلمیشم، استانبولدا بؤیوموشم و استانبولدادا یاشاییرام .
- دئدیم ،سیز اگر استانبولدا دونیایا گلیب استانبولدا بؤیویوب و استانبولدا یاشاییرسینیزسا نئجه اولور تورکجه بیلمیرسینیز ؟
- دئدی ، من تورکجه بیلیرم آمما تورکجه دانیشماق ایسته‌میرم ، سیز منله یونانجا و یا فرانسیزجا دانیشا بیلرسینیز !
- دئدیم ، من ده یونانجا بیلمیرم و فرانسیسجا راحاتجاسینا دانیشا بیلمیرم ؛ ائله ایسه تورکجه دانیشماسان من‌ده سنی معاینه ائتمه‌رم !
بئله اولدوقدا خسته رئیسیمیزین یانینا گئدیب شکایت ائتدی . رئیس منی چاغیریب ماجرانی سوروشدوقدا من موضوعونو اولدوغو کیمی رئیسه آچیقلادیم .
رئیس مهربانجاسینا الینی چیگنیمه قویوب دئدی :
" دوکتور بَی (او گونه کیمی منه دوکتور بی دئمه‌میشدی ) من سنین بو دویقولارینا سایقی بسله‌ییرم و حاقّی سنه وئریرم ،آمما بیز طبیب‌لر آند ایچمیشیک حتی دوشمنیمیز اولان خسته‌نی‌ده هرجور شرایط و دورومدا اولورسا اولسون معاینه و معالجه ائدک !"
سونرا من او خسته‌نی چتین بیر دورومدا معاینه و مداوا ائتدیم .
البته سونرالار پاریس‌ده جراحلیق تخصصینی تکمیل ائتدیگیم زامان، دانشکده گیره‌جگینده تابلودا یازیلان بئله بیر جمله‌نی طّب حرفه‌سینده اؤزومه اؤرنَک گؤتوردوم :
" من تانیمیرام سن کیمسن؛ دوست سان و یا دوشمن؟ سن خسته سن؛ یالنیز دردینی منه سؤیله ! "