آقای دوکتور هئیت ، سیز پان تورکلرین رئیسی سینیزمی ؟ (10)

                                     دوکتور هئیت‌دن اؤزل خاطیره‌لر   

                                   حسن راشدی : اول اوردیبهشت  ۱۳۹۴ 

سؤیله‌نیلن تاریخ : ۴ اسفند۱۳۷۹ پنجشنبه

مکان : " جان آذربایجان " دفتری ، " قومیت لر " جلسه‌سی ، جمالزاده خیابانی ، تهران

زامان : آخشام اوستو

۱۳۷۹ جو ایل دی آیی‌نین ۱۰ جو گونو تهرانین جنوبی جمالزاده خیابانیندا  " جان آذربایجان " آدلی بیر دفتر آچیلدی ^(۱) ؛ بو دفترده تورکجه - فارسجا هم " پیک آذر "مجله‌سی حاضیرلانیر و هم " قومیت‌لر جلسه‌سی " و یا فارسجا دئییلن "​جلسه قومیت ها " تشکیل تاپیردی .

بو مکان ۱۳۷۹ جو ایلین سونلارینا یاخین جنوبی جمالزاده خیابانی‌نین بیر آز آشاغاسینا و کوچه نین ایچینه منتقل اولدو . " قومیت‌لر " جلسه‌سینده ایرانین مختلیف میلّیّت‌لریندن اولان او جمله​دن تورک ، عرب ، تورکمن و کورد میلّی فعاللاری نماینده‌لری اشتراک ائدیر و ایرانین آنایاساسی‌نین ۱۵ و ۱۹ جو ماده​‌سی‌نین نئجه اجرا اولماسی باره​ده  فیکیر موبادیله​سی آپاریردیلار ، بو جلسه‌لرده یالنیز بلوچلاردان نماینده یوخ ایدی .

جلسه‌ آدی​نین " قومیت​لر جلسه​سی " اولماسیندان هئچ کس راضی دئییل ایدی و اونون آدی‌نین "میلّیت‌لر جلسه​سی " اولماسینی داها اویغون گؤروردولر ، آمما دؤلت ایراد توتماسین دئیه بو آدلا جلسه‌لر کئچیردی .

اصلینده بو جلسه‌نی بیزلر ( تورکلر ) تشکیل ائتمیشدیک آمما باشقا میلّیت‌لری‌ده جلسه‌یه چاغیریر و اونلارلا بیرلیکده آنایاسانین 15 و 19 جو ماده‌سی‌نین نئجه اجراسینا یازیلی متن حاضیرلاماغا پلانا باشلامیشدیق و بو ساحه‌ده حتی حقوق‌شناسلارلادا گؤروشمک و متن حاضیرلاناندان سونرا دوستلار طریقی‌ایله مجلیس نماینده لریندن 50 نفره قدر امضاء آلیب و مجلیسده بیر طرح کیمی مطرح اولماسینی‌دا نظرده توتموشدوق .

بو جلسه‌ده آردیجیل اولاراق تورکلردن:

 دوکتور جواد هئیت ، من ( حسن راشدی ) ، اکبر آزاد ،  محمدرضا هئیت ، کمال مرادی ، علیرضا صرافی ، دوکتور حسن جعفرزاده ، ابراهیم رفرف و ...

عرب لردن : عزیزی بنی طرف ، مشرّف

تورکمنلردن : عبدالرحمان دیه جی

کوردلردن : دوکتور ابریشمی

شرکت ائدیردیک . جلسه‌ده تورکلردن علاوه باشقا میلّیّت‌لر اولدوغونا گؤره رسمی جلسه‌ده دانیشیلان دیل عمومیتله فارسجا ایدی . بو جلسه‌نین بیرینجی ایشلریندن 773 نفر مجلیس نماینده‌لری و قلم اهلی اولان تانینمیش انسانلارین امضاسی‌ایله 1380 جی ایلین اوللرینده جمهور باشقان محمد خاتمی‌یه یازیلان و 15 و 19 جو آنایاسا ماده سی‌نین اجراسینی ایسته‌مک مکتوبو اولدو .  

بو مکتوبون قیسا متنی اوردیبهشت آیی‌نین 16سی 1380 جی ایل تهرانین همشهری ، آفتاب یزد ، صدای عدالت و همبستگی گونده لیکلرینده  چاپ اولدو .

بو جلسه‌لرین بیرینده  و اسفند آیی‌نین دؤردونده جلسه نین آغ ساققالی دوکتور هئیت دئدی :

" بو هفته دؤلت طرفیندن " وزارت امور خارجه" ده تشکیل تاپان  " ایران - توران " جلسه‌سینده  ورجاوند و عنایت اله رضادا وار ایدی ، اونلار بیزلری بوردا گؤردوکده چوخ ناراحات و عصبی اولموشدولار ، چونکو  لازیم اولان و انتظارلاریندان اوزاق اولان جاوابلاری بیزلردن ائشیدیردیلر .

جلسه قورتاراندان سونرا دوکتور مهاجرانی باصطلاح دانیشگاه اوستادی وظیفه‌سینی داشییان یانینندا دوران بیر نفره منی تانیتدیریب دئدی :

" آقای دوکتور هئیت " وارلیق " مجله سی‌نین مدیری دیر ." دانیشگاه اوستادی آدینی داشییان بو آدام منه دؤنوب دئدی : آقای دکتر شما رئیس پان ترکها هستید ؟ ( آقای دوکتور سیز پان تورک‌لرین رئیسی سینیزمی ؟) . مهاجرانی اوتاناراق باشینی آشاغا سالدی ، من گؤردوم بو آدام هم ساوادسیز هم ادب‌سیزدیر  ؛ دئدیم : بلی !

سونرا آرتیردیم ، سیز وارلیق مجله‌سینی اوخویوبسونوزمو ؟   دئدی : نه ( یوخ ) .

 دئدیم اگر سیز وارلیق مجله‌سینی اوخوماییب‌سیزسا نه‌دن دئییرسیز من پان تورکلرین رئیسی یم؟

دئدی : بئله دئییرلر .

من دئدیم : اؤلوم اولسون نه قدر پان تورک ، پان فارس ، پان آریا و باشقا پان وار  ....!

سونرا دوکتور مهاجرانی او آداما اوزونو توتوب دئدی :

آقای دوکتور هئیت ایرانین ماهر جراحی و تانینمیش شخصیتی آقای علی هئیتین اوغلودور.

...........................................................................................

^{(۱) بو مکانین کیمین طرفیندن آچیلماسی‌نین آدی‌نین گلمه‌سینه بلکه اؤزو راضی اولماسین دئیه آدینی گتیرمه‌دیک}