یوردداش yurddaş

بو بلاگ آذربایجانلیلارین و ایراندا یاشایان باشقا تورکلرین دیل ، تاریخ ، مدنیت ، فولکلور و انسانی حاقلاری ساحه سینده چالیشیر .

اردبیل - موغان مدنی- تاریخی سفردن خاطیره ( ایکینجی بؤلوم)

+0 بَگَن (Bəyən)

          

         اردبیل  - موغان مدنی- تاریخی سفردن خاطیره ( ایکینجی بؤلوم)             

             « ایلدیریم » شاعیردن تجلیل و «شاطیر گونبذی» !

 

آخشام ، دعوت اولدوغوموز یئرده « ایلدیریم » تخلّص‌لی شاعیردنده تجلیل اولور ؛ شعر اوخونور  و بعضیلری‌ده کئچمیش خاطیره لریندن دانیشیرلار. شاعیر ایلدیریمی من‌ده تانییرام آمما بلکه اوتوز ایلدن چوخدور بیربیریمیزی گؤرمه میشدیک ؛ 1361- 1365 جی ایللرده تهراندا و خیّام خیابانی « پارک شهر» قارشیسیندا رحمتلیک علی تبریزی‌نین«آتروپات» آدیندا کیتاب دوکانیندا ایکی هفته‌دن - آی دان بیر توپلاشیب ، شعر- داستان اوخویوب مدنی حاقلاریمیز ساحه‌سینده فیکیر مبادله‌سی آپاراردیق، ایچیمیزده ارتشی - خلبان‌دا واریدی، او گونلر هله بوجور توپلانتی‌لارا بوگونکو کیمی سیخینتی - بوغونتو یوخ ایدی....!

گئجه یاریسینا یاخین عزیزلَمه مراسیمی باشا چاتیر و هرکس ائوینه گئدیر ، بیزده قوناق اولدوغوموز ائوده یاتیریق.

صاباحین برنامه‌سی، اردبیل یاخینلیغیندا و شهرین گون باتانیندا خالق آراسیندا «سوما» دؤلتی یازیلاریندا ایسه«صومعه»آدی ایله تانینان کندین یاخینلیغیندا بیر تاریخی بورج و یا گونبذ بیناسینی و اوندان سونرادا اردبیلین آلتمیش بئش کیلومترلیگینده و «خیاو» ( مشگین شهر) یولو اوستونده چوخ تانینمیش یئددی- سگگیز مین ایللیک تاریخه مالیک و «شَهَر یئری» آدی ایله مشهور اولان تاریخی یئری گؤرمه‌یه گئده‌جه‌ییک....!

پنجشنبه گونو  آبان آیی‌نین 18-ی ایکی مینیک ماشینلا اردبیلین باتی‌سیندا  و تقریبا 7 -8 کیلومتر فاصله‌سینده «سوما» یا همان « صومعه» کندینه گئدیریک، نسبتا بؤیوک کنددیر؛ کند ایچینده آداملار حرکتده‌دیلر، ناهارا یاخین اولدوغوندان و کند مسجیدینده احسان وئریلدیگینده احسان یئمه‌یه مسجیده طرف گئدیرلر!

بورج و یا گونبذین هاردا اولدوغونو سوروشماق، همده گونبذین آدینا کندده نه دئییر و اونون حاقدا نه داستانلار سؤیله‌ییرلر باره‌ده گؤزوموز، یاشا دولموش  آدام آختاریر، آمما 60- 65 یاشدان یوخاری آدام اطرافدا گؤرمه‌دیکده اونلاردان سورغولاریمیزی سوروشوروق، جاواب اولاراق:

« گونبذ، کندین قبله‌سینده و آدینادا « شاطیر گونبذی»  دئییرلر» دئدیلر.

نییه « شاطیرگونبذی» دئییرلر، چوخ آچیقلایا بیلَن یوخدور ، بیزیمده واختیمیز یوخدور درین آراشدیرماغا.

کنددن بیر آز چیخاندان سونرا « شاطیر گونبذی» گؤزوموز قاباغیندا جانلانیر، تقریبا کندین 200-300 مترلیگینده و اکین یئری‌نین اورتاسیندا یئرلَشیب. بورانین اکین یئرلرینده « قند چوغوندورو» اکیرلر؛ بورا «ساوالان» داغی‌نین اته‌یی اولدوغوندان آخار سولار چوخدور.

      

گونبذین یانینا گئتمه‌یه راحات یول یوخدور، تراکتور خطی کیمی بیر یول ایله و تورپاق ایچیندن گئدیریک.

بو گونبذ و یا بورج گورنتوسو اولان تاریخی اثرین تهرانین جنوبوندا و «شهرری»ده یئرله‌شن و « برج طغرل»آدی ایله تانینان و تاریخده‌ده  سلجوق امپراتورلاری‌نین بیرینجی پادشاهی و 433 - جو هجری قمری‌دن 455- جی ایله دک «شهرری»یی اؤزونه پایتخت سئچیب و نهایت بو شهرده وفات ائدن سلجوق پادشاهی «توغرول بگ » دفن اولان بورجا اوخشارلیغی چوخدور؛ یعنی سلجوقلار دؤنمینه عاید اولان بینالارا داها چوخ بنزَری وار.

بو بورجون تاوانی (سقفی) آچیق و یا زامان سوره‌سینده و قار- یاغیش- یئل تاثیرینده تؤکولموشدور، اصلی دیوارلاری‌دا تؤکولمَکده دیر، بورج دیواری‌نین بیر طرفی اوچموش  قالانی‌دا اوچماقدادیر ، صاحیب‌سیز بیر تاریخی اثردیر!!

بورجون ایچینده قبیر کیمی یئرده ، سال داش‌دا گؤرونور ، اونون یانیندا ساخسی قاب سینیقلاری ‌دا وار، آمما ایچَریه او قدر تاواندان سینیق کرپیج پاراسی و تورپاق تؤکولوب کی، بورجون ایچَریسی‌نین نه دورومدا اولدوسونو تشخیص وئرمک چتیندیر!

« شاطیرگونبذ»ین 20-30 مترلیک و گونئی دوغوسوندا بیر تورپاق تپه وار، نظره گلیر تؤکمه تپه‌دیر، اونون‌دا اطرافیندا چوخلو سینیق ساخسی قابلار تیکه‌سی وار، بورانی‌دا گؤروب، صاحیب سیز قالان تاریخی اثرلریمیزین آرادان گئتمه‌سی‌نین شاهیدی اولدوقدا یوزلر افسوس یئمک و یازیقلار اولسون بیزه دئمکله اردبیلین 65 کیلومترلیک قوزئیینده یئددی - سگگیز مین ایللیک تاریخی «شَهَریئری »نی گؤرمه یه حاضیرلاشیریق...!