+0 بَگَن (Bəyən)
" دوکتور نطقی" نی ممنوع الورود ائله
میشدیلر (15)دوکتور هئیت‌دن اؤزل خاطیره‌لر
حسن راشدی : 11 دی ۱۳۹۴
سؤیله‌نیلن تاریخ :شنبه 30 مرداد 1380
مکان : تهران ، وارلیق دفتری ( دوکتور هئیت مطّبی)
زامان : آخشام اوستو
جلسه ده اشتراک ائدنلر : حسن راشدی ، اکبر آزاد ، ساوالان ، صرافی ، رفرف ، میر هدایت حصاری ، محمدرضا هئیت .
بو جلسه ، اورتوگرافی سئمیناریندان سونرا تشکیل تاپان جلسه سیرالاریندان ایدی و اورتوگرافی نتیجه‌لری باره‌ده دانیشیلیر و بو نتیجه‌نین جزوه شکلینه سالینماسی و اوخوجولارین اختیاریندا قویولماسی باره‌ده تصمیملر توتولماقدا ایدی .
بو جلسه‌ده سؤز 8 الی 15 تیرده و بیر هفته‌لیک بابک قالاسیندا کئچیریلن " بابک قالاسی مراسیمی " باره‌ده و بو مراسیمده 500 مین نفردن چوخ اشتراک ائدنلردن گئتدی .
جلسه‌ده دئییلدی کی ، " میلّی امنیت شوراسی " ( شورای امنیت ملی ) جلسه قوروب و بابک قالاسی توپلانتیسیندا 500 مین نفره یاخین اشتراک ائدنلرین سایینی تائید ائدیب .
گویا امنیت شوراسی جلسه‌سینده بابک قالاسی مراسیمی‌نین یارانماسی تجزیه تحلیل اولوب بئله بیر نتیجه اله گلمیشدیر :
" بابک قالاسی مراسیمی‌نین هر ایل تشکیل تاپماسی خطرلی‌دیر ، بو اوزدن گلَن ایلدن بو توپلانتی‌نین یا قاباغی آلینمالی و یا باشقا فارس شهرلریندن ، حتی سیستان - بلوچستاندان اوتوبوس اوتوبوس آدام بابک قالاسینا آپاریب بابکی بیر آذربایجانلی شخصیت کیمی یوخ بیر فارس قهرمانی کیمی گؤستریب تورکلرین الیندن چیخارمالییق ."
شورا جلسه‌سینده دئییلیب: "بابک قالاسیندا بو قدر آداملارین توپلانماسی تورکیه ایله آذربایجان جمهوریتی‌نین ایشی دیر......"
سؤز بورا چاتدیقدا دوکتور هئیت گوله‌رک دئدی :
" بو دؤلته باخ ، گؤر نه خیال ائله ییر ؟ مگر تورکیه ایله آذربایجان بو قدر اینسانی اودا آذربایجانین بوتون شهر و کندلریندن ، حتی تهراندان بابک قالاسینا توپلایا بیلرمی؟ "
سونرا تورکیه‌نین اصلا ایراندا یاشایان میلیونلار تورکلرین فیکیرینده هئچ اولمادیغی حاقدا دوکتور نطقی باره ده بیر خاطیر‌ه‌نی بئله تعریف ائتدی :
" تورکیه دولتی دوکتور نطقی کیمی عالیم ،لیاقتلی و بؤیوک بیر شخصیتی نئچه ایل تورکیه تورپاغینا کئچمه‌یه ممنوع الورود ائله‌میشدی ، ایندی بو دؤلت گلیب بیزدن حمایت ائله‌ییب آدام ییغیر بابک قالاسینا ؟!"
سونرا آرتیردی :
" بیر گون من ائشیتدیم کی ، دوکتور نطقی‌نی تورکیه‌یه ممنوع الورود ائله ییبلر ، دوکتور نطقی اؤزوده بو مسئله‌نی منه دئمیردی ، بیر گون" آیتن خانیم " دوکتورون حیات یولداشی بو موضوعونو منه دئدی . سونرالار من تورکیه‌یه گئدنده بیر توپلانتی‌دا اونلارین بیرینه [ وزیرلرینه یا بؤیوک سیاسی شخصیتلری‌نین بیرینه کی، آدینی دئدی ] دئدیم:
"اولوس مئیدانیندا آتا تورک هئیکلی وار یا ....؟
دئدی : وار
دئدیم ؛ دوکتور نطقی‌نین هئیکلینی اونون یانیندا دیکمک لازیم... !
سونرا دوکتور نطقی‌نین علمی درجه‌سینی و یوکسک شخصیتینی اونلارا آنلاداندان سونرا دستور وئردیلر تورکیه‌یه ممنوع الورود اولماسی لغو اولسون . ایندی تورکیه بئله دیر آمما بونلار نه خیال ائله ییرلر ؟!"