باکی "دا دوکتور جواد هئیت مراسیمی

                                     حسن راشدی: 9 تیر 1395

24 ژوئن2016 میلادی  ( 4 تیر 1395 هجری گونش ایلی)  قوزئی آذربایجانین " بورچالی اجتماعی جمعیتی " طرفیندن اؤلکه‌نین پایتختی " باکی " شهرینده اؤنملی بیر تورَن کئچیرلدی .

آذربایجان ادبیات تاریخینده اؤزونه اؤزل یئر قازانان و " وارلیق " درگیسینی 35 ایل و عؤمرونون سونونا قدر منتشر ائدن و هر ایکی آذربایجانین سئویملیسی اولاراق وفاتیندان اؤنجه هم گونئی و هم قوزئی آذربایجانین آغ‌ساققالی ساییلان دوکتور جواد هئیت وفاتی‌نین ایکینجی ایل اؤنومو یاخینلاشارکن "تبریز گئجه‌سی " آدی ایله بیر مراسیم حاضیرلانمیشدی.

مراسیمی کئچیرنلر ، دوکتور جواد هئیتین معنوی اولادی و وارثی ساییلان " دوکتور محمدرضا هئیت "ی آنکارادان و بیر تعداد باشقالاری ایله بیرلیکده منی‌ده گونئی آذربایجاندان بو مراسیمه قاتیلماغا دعوت ائتمیشدیلر .

تورَن ، دوکتور جواد هئیت آدینا باکی‌نین گؤزل مراسیم سالونلاریندان ساییلان" خدافرین " ساراییندا و جمعه گونو 24 ژوئن 2016 ( 4 تیر 1395 هجری شمسی ) ساعات 17دن باشلاندی .

مراسیمه آذربایجان آکادئمی اعضالاریندان ، تانینمیش شاعیر ، ادیب ، محقق لردن علاوه  مجلیس نماینده لری و پارتیا باشقانلاری دا قاتیلمیشدی.

بو مراسیمده ، دوکتور هئیت بیر طبیب و جرّاح اوزمانی اولاراق آذربایجان ادبیاتی و حتّی تورک دونیاسی ادبیات و تاریخی حاقدا هانسی باجاریقلارا مالیک اولدوغو و ایکی آذربایجانین سئویملیسینه چئوریلدیگی حاقدا قاتیلیمجیلار طرفیندن دگرلی چیخیشلار اولدو.

مراسیمین سونوندا " دوکتور جواد هئیت " مدالی ، اؤز اؤرک سؤزلرینی یازیب یوللایان و مراسیمده اوخونان  لاکین ایشیندن دولایی مراسیمه قاتیلا بیلمه‌ین" دوکتور محمدرضا هئیت " ه و گونئی‌دن قاتیلانلارا تقدیم  اولدو.