+0 بَگَن (Bəyən)
آقای روحانی تبریک لر !
حسن راشدی : 30
اوردیبهشت 1396
میلّت سیزه اعتماد ائتدیگیندن و یا باشقاسی‌نین ایش باشینا گلیب جامعه ده داها محدودیت یارادیب یوخ گوجو ایله دونیایا مئیدان اوخوماسیندان و میلّته داها چتین دوروم یاراتماق قورخوسوندان ایسه ، سیزی رئیس جمهور ائتدیلر ، اانشاالله ایشلرنیزده موفق اولاسینیز.
ایندی سیزده ایران تورکلری‌نین ایستک‌لرینی و بو ایسته یین ان ایلکین اولانی " آنا دیلده " و ابتدایی دن تحصیل مسئله سینی اونوتمایاسانیز !
اگر بو دفعه کی سئچگی اؤنجه سی تبلیغاتلارینیزدا آنا دیلی تحصیلی باره ده آذربایجانلیلارا و ان آزی 32 میلیون ایران تورکلرینه سؤز وئرمه دینیز و یا سؤز وئرمه یه اجازه نیز اولمادی سا ، بیلین و آگاه اولون بو 32 میلیون نفوسون دیلینده ، اودا ابتدایی دن و رسمی دیل ایله یاناشی و اونونلا برابر مدرسه لرده درس قویولماسا، ایران ایچینده بیرلیک یاراتما امکانلارینی الدن وئره بیلرسینیز و بونون نتیجه و سونوجودا یقینا مثبت اولمایاجاقدیر.
تحصیل مسئله سی و اونون امکانلارینی، یعنی معلّم ، کیتاب و باشقا لازیم اولان ملزمه لری دؤلت یاراتمالیدیر، بونو 1358 جی ایل و آنایاسا (قانون اساسی) یازیلان زامان یقینا شهید بهشتی‌نین دیلیندن ائشیدیبسینیز، ائشیتمه میش اولسانیزدا بوردان ائشیدیب فیلمینی ده گؤره بیلرسینیز .
اگر آنا یاساسی نین 15جی ماده سی نین اجراسینا سیزده صداقت و اراده وارسا و اونون اجراسینا باشقا آداملار و یا اورگانلار مانع اولورلارسا ، بو ماده نین تصویبی زامانی شهید بهشتی نین بو حاقدا اصرارلا دانیشیقلارینی ( هم فیلم و هم سسینی ) و دولتین وظیفه سینه اشاره ائتدیگینی اونلارا گوستره بیلرسینیز، آمما یئنه بو 32 میلیون نفوس و اونلارین ایستکلرینه بی اعتنا و لاقید قالارسانیزسا ، یقین بیلین کی ، چوخلو مسئله لرین یارانماسینا سبب اولابیلرسینیز.