یوردداش yurddaş

بو بلاگ آذربایجانلیلارین و ایراندا یاشایان باشقا تورکلرین دیل ، تاریخ ، مدنیت ، فولکلور و انسانی حاقلاری ساحه سینده چالیشیر .

آذربایحان یاتماییب ، کیملیگینی آتماییب !

+0 بَگَن (Bəyən)
 Image result for ‫دریاچه ارومیه‬‎
        
آذربایحان یاتماییب ، کیملیگینی آتماییب !

حؤرمتلی  آذربایجان و ایرانین بوتون شهر و بؤلگه‌لرینده یاشایان تورک باجی قارداشلار!

بو گونلر ، ایرانین بیر چوخ شهرلرینده اعتراض نمایش و تظاهراتلاری کئچیریلیر؛ بو اعتراض نمایشلرین طبیعی کی، چوخو حاقلی و مختلیف چاتیشمامازلیق، سیخینتی،باسقی و فیشارلاردان آسیلی اولاراق مئیدانا گلمیشدیر، آمما بو تظاهراتلار و اعتراضلارین ایچینده بعضی شعارلار وئریلیر کی، بیزیم میلّی حرکت ، حاقلی ایسته‌ییمیز و انسانی معیارلارلا تضاددادیر:

" روحت شاد رضا شاه/ ایران که شاه نداره ،حساب کتاب نداره/ ما آریایی هستیم، عرب نمی پرستیم" شعارلاری بیزیم شعاریمیز و ایسته‌ییمیز دئییل.

بیزه : " آذربایجانلیلار  قورخولاریندان خیابانا و اعتراضا چیخمیرلار " دیینلره دئییریک، بعضی موقع‌لر بیزیم اؤزل و معیّن بیر زامانا قدر سکوتوموزون چوخ درین آنلام و معناسی وار سیز باشا دوشسه‌نیز!"

بیز بئله شعارلارین قارشیسیندا :

" اورمو ، زنجان ، آستارا  -  قورخو هارا بیز هارا ؟! / هارای، هارای من تورکم- قورخو بیلمزدیر اؤلکم/ اؤز دیلینده مدرسه - اولمالیدیر هر کسه / اورمو گؤلوموز اؤلمز -  اؤلکه‌می دوشمن بؤلمز/ أل أله وئر قارداشیم - دیل بیر اولاق دیلداشیم"  و باشقا میلّی منافعیمیز و انسان حاقلاری اساسیندا شعارلاریمیز وئریلمه لیدیر.

رضاخان ،حکومتی کودتا ایله ایراندا أله کئچیردیکدن بو گونه قدَر و اونون اوغلو محمدرضا پهلوی‌نین یوروتدویو پان فارسیسم ایدئولوژیسی ، ضد انسانی و ضد تورک سیاستی نتیجه‌سینده  و بو تفکّورون بو گونده گوجلنمه‌سی داوامیندا حتی بو گونلرده‌ده ورزش مئیدانلاریندا تورک اولدوغوموزا گؤره شوونیستی و نژادپرستانه شعارلارلا قارشی- قارشی‌یا قالیریق و آنا یاسانین 15 جی ماده‌سی‌نین اجراسی 39 ایل انقلابدان کئچندن سونرادا هله‌ده مکتبلریمیزه یول تاپماییب و اورمو دریاچه‌میز شور چؤلونه چئوریلمکده‌دیر!

بیزیم اعتراضلاریمیز، میلّی منافع، انسان حاقلاری ، هویّت و کیملیگیمیزی قوروماق چرچیوه سینده اولمالیدیر .

                                  حسن راشدی : پنجشنبه   14 دی 1396