+0 بَگَن (Bəyən)
اردبیل- موغان مدنی- تاریخی سفردن خاطیره (بیرینجی بؤلوم)
« شاطیر گونبذی» صاحیب سیز تاریخی اثریمیز ، « شهر یئری» آذربایحانین دوققوز مین ایللیک تاریخی و ... !
حسن راشدی آذر آیی 1396
آچیقلاما :بو خاطیره سفری 1396 جی ایلین آذر آییندا یازیلیب آمما ایلک دفعه اولاراق پایلاشیلیر و نئچه بؤلومدن تشکیل تاپیب کی، نوبت ایله تلگرام ، اینستاگرام ، فئیسبوک صحیفه لریمیز و « یوردداش » وئبلاگیمیزدا پایلاشیلاجاق.
اردبیلده یاشایان اسکی و قدیمی بیر دوستون دعوتی ایله اوچ ادبیاتچی، اوچ نفر دیلیمیز ،ادبیاتیمیز و تاریخیمیزله ماراقلانان،ایکیسی‌نین یاشی بیربیرینه یاخین ، اوچونجوسوایسه یاشدان کیچیک اولسادا پیشمیش شاعیر اولدوغوندان قارشی‌دا اولان ادبی- مدنی - تاریخی بیر سفره چرشنبه گونو آبان آیی‌نین 17 سی 1396 جی ایل تهراندان اردبیله طرف یولا دوشورلر.
یعنی من ماشین سورورم ، صبح ساعات دوققوزدا معاصیر و مهارتلی شاعیر آمما یاشی مندن آز سعید موغانلی‌نی تهراندان گؤتوروب تهران - کرج یولو اوستونده تجروبه‌لی شاعیر و محقق و بیر یاش مندن کیچیک حسین محمدخانی (گونئیلی) نی‌ده یانیمیزا آلیب یولا داوام ائدیریک.
اوچوموزون سؤزوموز یاخشی توتور ، هر اوچوموز ادبیاتچی‌ییق. ماشیندا موسیقی - زاد ائشیتمه یه احتیاج یوخ، چونکو یول اوزونو دانیشماغا زامان آز گتیرمه‌سک اؤزوموزو شانسلی ساناریق!
صبحانه میزی کرج- قزوین اوتوبانی قیراغیندا یئمک ایسته‌ییریک. اوتوبان قیراغیندا ماشین پارکینگی یئرینده یئره دوشوب ، گؤتوردویوموز چای فلاسک یا عموم آراسیندا دئییلن فلاکس‌یمیزی حاضیرلاییریق. اوتوباندان قیراق سئیرک آغاجلارین آلتیندا «آلتدیق - سوفره» سریب ، سرینله - سویوق آراسیندا اولان هاوادا پنیر - شیرین چای یئمه‌یینه باشلایاندا مگر میلچکلر قویورلار صبحانه میزی راحاتلیقلا ییه‌ک!
او قدر میلچک سوفره باشینا گلیر کی ، اوچوموزده اللریمیزله اونلاری قووالاماغا چالشیریق. میلچکلر بیزدن زرنگ اولدوقدا هئچ بیلمیریک صبحانه میزی آغزیمیزا یوخسا بورنوموزا یئییریک!
بورادا، میلچکلر ایرانلیلارین کیتابلاردا اوخودوقلاری « هنر نزد ایرانیان است و بس ! » هونر، تمدّن و مدنیتدن یارارلانمیشدیلار!
یعنی بورا گلیب دوشن آداملار چئوره‌ده او قدر اؤزلریندن یئمک آرتیغی، پوفک - زاد بوراخمیشدیلار کی ، میلچکلرین خبری اولدوقدا بوتون قونشو - اقرابالاری ایله بورا تشریف گتیرمیشدیلر !!
قزوین - زنجان اوتوبانیندا یولوموزا داوام ائده‌رک مگر دیل، ادبیات، تاریخ و میلّی مسئله‌لردن دانیشماقدان یورولوروق مو؟
بلکه ساعات ایکی یاریم زاد اولار زنجان شهرینه چاتیریق ؛ ناهار یئمه‌ییمیزی زنجان شهری‌نین « داش‌کاروانسرا » آدی ایله تانینان رستورانیندا یئییریک؛ بو ایشله ایکی هدفی نظرده توتموش اولوروق، هم آجلیغیمیزی جانیمیزدان چیخارماغا ناهاریمیزی یئییریک، هم صفوی دؤنمینه عاید و ایللر بویو تبریز- قزوین آراسی کاروانلارینا خیدمت ائدن و بو گون اؤز ایچَری و دیشاری گؤرونتوسونو قورویاراق گله‌نکسل (سنّتی) بیر رستوران چرچیوه‌سینده یئنه مسافیرلره خیدمت وئرَن بیر تاریخی مکانی یاخیندان گؤرموش اولوروق.
یول اوزونو هر موضوع‌دان دانیشیب، هردن بیر استراحت ائدیب سرچم - اردبیل یولونا دوشه‌رک 12 امام آدینا اون ایکی تونلی کئچیب آخشام چاغی ساعات یئددی جیواری اردبیله چاتیریق ، نورمال زاماندان گئج چاتمیشیق ، چونکو یولوموزو گلمَکده هئچده تلَسمیردیک!